„Maður vill gera þessa hluti vel“. Viðbrögð fyrirtækja og stofnana við persónulegum áföllum starfsmanna og viðhorf starfsmanna til þeirra

Markmið rannsóknarinnar er að kanna hvernig vinnuveitendur taka á og bregðast við persónulegum áföllum og sorg hjá starfsmönnum. Áföll og sorg eru eitt af því sem flestir þurfa að takast á við á lífsleiðinni og snertir málefnið því marga. Atvinnuþátttaka er há á Íslandi og því líklegt að innan skipulagsheilda séu einhverjir sem hafa lent í áfalli eða sorg. Einnig er markmiðið að kanna hvert viðhorf starfsmanna, sem lent hafa í persónulegu áfalli, eru til vinnuveitandans og viðbragða í kjölfar áfallsins. Notast var við eigindlega rannsóknaraðferð og var mest stuðst við hugmyndafræði Vancouver-skólans. Tekin voru ellefu viðtöl, átta við starfsmenn um viðhorf þeirra til viðbragða vinnuveitandans og þrjú við mannauðsstjóra fyrirtækjanna og stofnananna sem tóku þátt í rannsókninni. Meginniðurstöður rannsóknarinnar eru að flestir vinnuveitendur telja sig vera að taka vel á þessum málum. Tekið var á hverju máli fyrir sig þegar það kom upp og því var lítið um skráð ferli. Mannauðsstjórarnir töldu þó að ferli eða gátlistar í slíkum málum gætu komið sér vel til hliðsjónar. Starfsmennirnir sem rætt var við voru allir ánægðir með hvernig tekið var á þeirra málum og var þakklæti mörgum ofarlega í huga. Flestir höfðu mikinn sveigjanleika á vinnutíma sínum og viðveru í kringum áfallaði en einhverjir hefðu þó eftir á að hyggja viljað fá meiri sveigjanleika á meðan álagið var sem mest